Музей “беларускай маляванкі” адкрыты!

18 траўня 2023 года стане знакавай датай у гісторыі беларускага мастацтва – менавіта ў гэты дзень у Заслаўі адкрыўся першы і пакуль адзіны ў краіне Музей “беларускай маляванкі”.

Гэтаму папярэднічала трыццаціпяцігадовая праца супрацоўнікаў Гісторыка-культурнага музея-запаведніка “Заслаўе”, якія збіралі ў розных кутках Беларусі творы народных мастакоў. З цягам часу менавіта горад Заслаўе стаў уладальнікам самай багатай калекцыі маляваных дываноў, якая перарасла ў асобны музей.

Памяшканнем для яго стаў флігель-эрмітаж былога палаца Пшэздзецкіх. Некалі там знаходзілася мастацкая галерэя: прасочваецца пэўная гістарычная пераемнасць.

Падчас урачыстага адкрыцця музея гучалі словы падзякі ўсім датычным да яго стварэння, а таксама папаўнялася калекцыя работ.

Намеснік старшыні Мінскага райвыканкама Ірына Ціхонка перадала ў дарунак музею маляваны дыван, які вісеў у хаце яе бабулі ў палескай вёсцы Карлаўка.

Заслаўскі гарвыканкам і прадпрыемства “Марк Фармель” таксама ўручылі адрэстаўраваны народны твор.

Пасля пераразання ганаровай стужкі і асвячэння будынка госці змаглі азнаёміцца з музеем.

У ім дзве сталыя экспазіцыі.

У адной зале прадстаўлены дзіўны свет Алёны Кіш.

Другая зала аддадзена Язэпу Драздовічу.

Алена Кіш і Язэп Драздовіч з'яўляюцца найбольш вядомымі прадстаўнікамі гэтага кірунку беларускага мастацтва, у Заслаўі знаходзіцца большасць захаваных іх работ.

У трэцяй зале будуць выстаўляцца зменныя экспазіцыі.

Галоўны захоўнік фондаў Гісторыка-культурнага музея-запаведніка “Заслаўе” Аляксандр Рак расказаў ганаровым гасцям, як стваралася калекцыя, якія аўтары тут будуць выстаўляцца.

Мы віншуем стваральнікаў Музея “беларускай маляванкі” з вялікім дасягненнем і запрашаем усіх жадаючых наведаць новы турыстычны аб’ект.